(1)
जब प्रेम के इजहार चले लागल
तब नेह के सनसार चले लागल
आदत जरे ओला के ढह गइल
नदी में नाव के सवार चले लागल।
-----------------
(2)
एह बसंत के लेके चर्चा खूब बा
केहू के त रंग डाले के मंसूब बा
आईं हमनियो के गुलाल घसीं जा
बिहंसीं सं खुलके काहे ऊब बा।
-----------------
(3)
तोहरे किरिया ई पीर बढ़त बा
आंखी में नेह के नीर बढ़त बा
संजोग जुट कहिया सोचत बानीं
दूर रहे के ई तकदीर बढ़त बा।
-----------------
(4)
कुंभ नेहान में केतना लोग मर गइल
केहू के बसेरा भगदड़ में उजर गइल
पता बा नू कि भीड़ में सोच ना होला
एह हूह में सपना कुल्ही बिखर गइल।
-----------------
(5)
माई बाबू से बढ़के दूजा कुछ होला का
आ सेवा से बढ़के पूजा कुछ होला का
साच कहला पर जबून लागेला कुछ के
चार रोटी से बढ़के भूंजा कुछ होला का।
---------------------------
लेखक परिचयःC/o डॉ नंद किशोर तिवारी
निराला साहित्य मंदिर बिजली शहीद
सासाराम जिला रोहतास ( सासाराम )
बिहार - 221115
मो 0 न 0 7488674912
कोई टिप्पणी नहीं:
एक टिप्पणी भेजें