जै हो माई शारदा
सुनी लऽ पुकार हो,
अरजी करेला माई
बेटवा तोहार हो
।
नाही चाहि धन-मान
नाही चाहि सुख हो,
ऐतने गोहार माई
देले रह दुःख हो!
जब-जब झूठ बोली
मुँह दुखलाए लागे,
बाउर जे बात सुनी
कान से पराये लागे!
जदि करि लूट-पाट
जाने सभ जवार हो,
अरजी करेला माई
बेटवा तोहार हो
।
रूप के घमंड करीं
मुँह दढ़ियाए लागे,
करीं जे भी हथजोड़ी
पेट बढ़ियाए लागे!
जांगर में घून लगे
बना दऽ बनिहार हो,
अरजी करेला माई
बेटवा तोहार हो
।
आँख जे तरेरली तऽ
डाली दऽ मनार हो,
अरजी करेला माई
बेटवा तोहार हो
।
चली जे भी ऊँच-नीच
गोड़ अंगिराए लागे,
सोझा करिं चपलूसी
उहो खिसियाए लागे!
माहुर जे उगली तऽ
आवे ना डकार हो,
अरजी करेला माई
बेटवा तोहार हो
।
करि जब नेतागिरी
देंह करियाए लागे,
तन-धन हलूक बाकिर
मन गढ़ियाए लागे!
पढ़ल-लिखल कम
हम बानि ढ़ेर गँवार हो,
अरजी करेला माई
बेटवा तोहार हो
।
दसो नख जोड़ी के
राउर करिले गोहार हो,
अरजी करेला माई
बेटवा तोहार हो
।
-----------------
अंक - 54 (17 नवम्बर 2015)
कोई टिप्पणी नहीं:
एक टिप्पणी भेजें