कइसे चलेलें सुरुज-चनरमा
धरतिया हे पिया केकर बनावल?
सुरुज-चनरमा चलें अपने गतिया
धरतिया हे धनि गति के बनावल।
माटी में बोके आपन परनवां
फसलिया हे पिया केकर उगावल?
माटी में बोके आपन परनवां
फसलिया हे धनि हमरे उगावल।
रचना के हथवा बिचरवा के रंगवा
सुरतिया हे पिया केकर जगावल?
रचना के हथवा बिचरवा के रंगवा
सुरतिया हे धनि हमरे जगावल।
मनवा के बगिया अजदिया के फुलवा
इ नेहिया पिया केकर लगावल?
मनवा के बगिया अजदिया के फुलवा
इ नेहिया हे धनि तोहरे लगावल।
-------------------------------
गोरख पाण्डेय
कोई टिप्पणी नहीं:
एक टिप्पणी भेजें