ए बनचीरी, ए बनचीरी!
कवन दिसा से अइलू पुतरी?
कवन घिरनियाँ, कथि के सुतरी?
कवन रचावल मंच अनोखा,
कवन लिखल अनबुझ तहरीरी?
ए बनचीरी, ए बनचीरी!
केकर अँगुरी डोर लपेटल?
कवन नटुअवा बाग समेटल?
खेलत डुमकच कवन छबीली,
आँक रहल सभकर तकदीरी?
ए बनचीरी, ए बनचीरी?
तिनुका जोरत, खोता सेवत,
दरस-परस, दृग पोंछत-भेंवत,
हिय के ताप मिटावलि धिअई
चुगत चोंच कीरी-पनजीरी।
ए बनचीरी, ए बनचीरी!
पाँखि झरल पाँजर बल छीजल,
कइसन देह बिधाता गींजल?
मंद परल आसते सकल सुर,
जिनिगी भरि के तानारीरी।
ए बनचीरी, ए बनचीरी!
पाँखि पसारे थकन बिसारे,
बोझिल अँखियाँ राह निहारे।
कहीं तान में तुलसी चउरे,
बारल केहू दीप अखीरी।
ए बनचीरी, बनचीरी!
-----------------
नाम - दिनेश पाण्डेय
जन्म तिथि - १५.१०.१९६२
शिक्षा - स्नातकोत्तर
संप्रति - बिहार सचिवालय सेवा
पता - आ. सं. १००/४००, रोड नं. २, राजवंशीनगर, पटना, ८०००२३
कोई टिप्पणी नहीं:
एक टिप्पणी भेजें