गीत जिनिगी के छन-छन, निहार लिखली,
जवन पवलीं अँजोर या, अन्हार लिखलीं।
केतने गुजरल ना जाने तपन जेठ के,
केतने सावन के रिम-झिम फुहार लिखलीं।
जवन पवलीं…
कहीं डगमगाति नाव के किनारा मिलल,
कहीं डूबत भँवर, मजधार लिखलीं।
जवन पवलीं…
पार केतने भइल ऊँच-खाल रहिया,
एक बहुते चढ़ाव, एक उतार लिखलीं।
जवन पवलीं…
बाते-बाते खनक जो गइल हाथ के,
कतहीं कँगना त कतहीं, कटार लिखलीं।
जवन पवलीं…
रंग बदलल जो मौसम कइक रूप में,
कबहूँ पतझर त कबहूँ, बहार लिखलीं।
जवन पवलीं…
फैसला हो सकल ना जमाना से,
हर कदम कहीं जीत, कहीं हार लिखलीं।
जवन पवलीं…
------------------------------------
लेखक परिचय:-
नाम: भोलानाथ गहमरी
जन्म: 19 दिसंबर 1923
मरन: 2000
जन्म थान: गहमर, गाजीपुर, उत्तरप्रदेश
परमुख रचना: बयार पुरवइया, अँजुरी भर मोती और लोक रागिनी
कोई टिप्पणी नहीं:
एक टिप्पणी भेजें