हे माई!
तनी फेरू एक बेर
अपना आंचर के छांव में तनी सुता दऽ
सुस्ताए दऽ।
जीनगी के आपाधापी-घुड़दौड़ में
पहिलका अस्थान पावे खातिर
हकासल, पिआसल दऊर-दऊर के
बहुते थाकि गइल बानी।
हे माई !
एक बेर फेरू
हमरा के बचपन में पहुँचा दऽ॥
जवन भूला गइल बा
जिनगी के मेढ़ पर
दाबा गइल बा
आडम्बर के बोझा से।
हे माई !
एक बेर फेरू
हमरा के बचपन में पहुँचा दऽ॥
हमार उमंग-बेपरवाही
पता ना कहाँ भाग गइल;
हमार फिकिर छोड़ावऽ
तनी फेरू हमरा
माथा पर हाथ फेर दऽ।
हे माई !
एक बेर फेरू
हमरा के बचपन में पहुँचा दऽ॥
-------------------
अशोक कुमार मिश्र
प्राचार्य
डीएवी स्कूल, कैमोर
कटनी, म. प्र.
कोई टिप्पणी नहीं:
एक टिप्पणी भेजें