चिन्ता के अगनी - राधा मोहन चौबे 'अंजन'

चिन्ता के अगनी तहरा के लेस-लेस खा जइहें

ए मैना तू आसरा छोड , तोता फेरु ना अइहें।

काहें आंख मिलवलू कइलू फुदुक-फुदुक के खेला

पतइन के कोरा में सटि के खूब लगवलू मेला

ना जनलू की पतझड़ आई, पात-पात झर जइहें

ए मैना तू आसरा छोड़ , तोता फेरु ना अइहें।

ढेर बहाना कइलू जग से, कनखी से बतिअवलू

देश-काल मौसम सगरो के ठुकरवलू लतिअवलू

पछतइला में का बाटे अब बीतल दिन लवटइहें

ए मैना तू आसरा छोड़ , तोता फेरु ना अइहें।

फगुनी हवा चइता के पुरवा बरखा परल फकारी

जड़वा के साथे-साथे रस लुटलू पांखि पसारी

भरल उमरिया के सब साथी ढलती के अपनइहें

ए मैना तू आसरा छोड़ , तोता फेरु ना अइहें।

आपन जिंनगी अपने काट ना केहू दुख बांटी

इ दुनिया ह सुख के साथी दुख के देहियां माटी

सुख में जे-जे चहकल साथे असमय देख परइहें

ए मैना तू आसरा छोड़ , तोता फेरु ना अइहें।

लागल पल भर पलक सुगनवा अचके में आ गइले

अइसन उमगल प्राण दुनू के साथे में उड़ गइले

मिलल नयन तब प्राण जुड़ाइल अंजन नसन जुड़इहें

ए मैना तू आसरा छोड़ , तोता फेरु ना अइहें।

----------------------------------

लेखक परिचय:-

नाम: राधा मोहन चौबे 'अंजन'

जनम: 4 दिसम्बर 1938

जनम थान: शाहपुर-डिघवा, थाना-भोरे

गोपालगंज, बिहार

रचना: कजरौटा, फुहार, संझवत, पनका, सनेश, कनखी, नवचा नेह, 

अंजुरी, अंजन के लोकप्रिय गीत, हिलोर आदि

अंक - 80 (17 मई 2016)