पतई के जिनगी - भोलानाथ गहमरी

डोलि गइल पतइन के पात-पात मन, 

जब से छु गइल पवन।

पाँव के अलम नाहीं

बाँह बे-सहारा,

प्रान एक तिनिका पर

टंगि गइल बेचारा,

लागि गइल अइसे में बाह रे लगन।

रचि गइल सिंगार

सरुज-चान आसमान,

जिनगी के गीत लिखे

रात भर बिहान,

बाँचि गइल अनजाने में बेकल नयन।

देह गइल परदेसी

मोल कुछ पियार के,

दर्द एक बसा गइल

घरी-घरी निहार के,

लुटि गइल जनम-जनम के हर सुघर सपन।

------------------------------------

लेखक परिचय:-

नाम: भोलानाथ गहमरी

जन्म: 19 दिसंबर 1923

मरन: 2000

जन्म थान: गहमर, गाजीपुर, उत्तरप्रदेश

परमुख रचना: बयार पुरवइया, अँजुरी भर मोती और लोक रागिनी

अंक - 77 (26 अप्रैल 2016)