जब गुजरीं तोहरा गाँव से - डॅा० जयकान्त सिंह 'जय'

नागिन बन के डंसे डगरिया

धरती खसके पाँव से, 

जब गुजरीं तोहरा गाँव से॥

छुपी कबले करुण कहानी 

खोली राज जमाना

मंजिल तक जो ना पहुँचब 

ई दुनिया मारी ताना

जब जब बइठल सोचीं सहमे

मनवा एही भाव से॥

जेतने दरद दबाईं दिल के

नेहिया पनपत जाले

देखीं कली के संग भँवरा ई

रहा रहा जियरा साले

हियरा हहरे हवले हवले

तोहरा ए अलगाव से॥

महक उठेला मन मंदिर में

प्रीतन के धूप काठी

हमरा तोहरा रुप गुण के

ई अंतर कब पाटी

जब जब गुजरीं तोहर नगरी

निरखीं नीके चाव से॥

सोना चंदन चान के टुकड़ा

कोइल के अस बोली

देहिया चितवा चमके चेहरा

याद पड़े हमजोली

नि:स्वारथ जो प्रेम ई पनके

चैन चोरावे दाव से॥

जयकवि कइसे दिल दरिया के

उठत ज्वार दबइहें

रूह जो रोवे केहू न जाने

कइसे नयन छुपइहें

धरम धरोहर करम कमाई

तोहरे लगन लगाव से॥

-----------------------------

लेखक परिचय:-

नाम: डॅा० जयकान्त सिंह 'जय'

जनम: 1 नवम्बर 1969, मशरक, बिहार

बेवसाय: भोजपुरी विभागाध्यक्ष 

एल एस कॉलेज, मुजफ्फरपुर, बिहार

अंक - 47 (29 सितम्बर 2015)